1Sa 1 | NdeIBE | STEP | Kwakulendoda ethile yaseRamathayimi, umZufi owayevela elizweni lamaqaqa elako-Efrayimi, ibizo layo lalingu-Elikhana indodana kaJerohami, indodana ka-Elihu, indodana kaThohu, indodana kaZufi, um-Efrayimi.

1 Samuel 1

Ukuzalwa kukaSamuyeli

1 Kwakulendoda ethile yaseRamathayimi, umZufi owayevela elizweni lamaqaqa elako-Efrayimi, ibizo layo lalingu-Elikhana indodana kaJerohami, indodana ka-Elihu, indodana kaThohu, indodana kaZufi, um-Efrayimi.

2 Wayelabafazi ababili; omunye wayethiwa nguHana omunye enguPhenina. UPhenina wayelabantwana, kodwa uHana engelabo.

3 Ngeminyaka yonke indoda le yayisuka emzini wakibo isiyakhonza inikela lomhlatshelo kuJehova uSomandla eShilo, lapho uHofini loFinehasi, amadodana amabili ka-Eli, ababengabaphristi bakaJehova khona.

4 Kwakusithi kungafika isikhathi sokuthi u-Elikhana anikele umhlatshelo, wayenika umkakhe uPhenina lawo wonke amadodana lamadodakazi akhe izabelo zenyama. 5 Kodwa uHana wayemnika isabelo esiphindwe kabili ngoba wayemthanda, kodwa uJehova wayesivalile isizalo sakhe.

6 Njalo ngenxa yokuthi uJehova wayesivalile isizalo sakhe, unyanewabo wayehlala emgolomba ukuze amcaphule. 7 Lokhu kwaqhubeka iminyaka yonke. Ngezikhathi zonke lapho uHana eye endlini kaJehova, unyanewabo wayemgolomba aze akhale njalo ehluleke lokudla.

8 “U-Elikhana umkakhe, wayesithi kuye, “Hana, ukhalelani na? Kungani na ungadli? Kungani udanile? Kuwe angiqakathekanga ukudlula amadodana alitshumi na?”

9 Kwake kwathi sebeqede ukudla lokunatha eShilo, uHana wasukuma. Ngalesosikhati u-Eli umphristi wayehlezi esihlalweni phansi kwensika yomnyango wethempeli likaJehova.

10 Ngobuhlungu bomoya uHana wakhala kakhulu njalo wakhuleka kuJehova.

11 Wafunga esithi, “Awu, Jehova Somandla, uma ungakhangela nje usizi lwencekukazi yakho ungikhumbule, njalo ungayikhohlwa incekukazi yakho kodwa uyiphe indodana, lapho-ke ngizayinika uJehova okwezinsuku zonke zokuphila kwayo, njalo akulampuco ezake isetshenziswe ekhanda layo.”

12 Ekuqhubekeni kwakhe uHana ekhuleka, u-Eli wananzelela umlomo wakhe. 13 UHana wayekhuleka enhliziyweni yakhe, izindebe zakhe zinyikinyeka kodwa ilizwi lakhe lingezwakali. U-Eli wacabanga ukuthi wayedakiwe 14 ngakho wathi kuye, “Koze kube nini ulokhu udakwa na? Yekela iwayini lakho.”

15 UHana waphendula wathi, “Akunjalo nkosi yami. Ngingowesifazana ohlupheke kakhulu. Kade nginganathi wayini kumbe utshwala. Kade ngithululela umphefumulo wami kuJehova.

16 Ungathathi incekukazi yakho njengowesifazana ogangileyo; kade ngikhuleka lapha ngenxa yosizi lwami olukhulu kanye lobuhlungu.”

17 U-Eli waphendula wathi, “Hamba ngokuthula, sengathi uNkulunkulu ka-Israyeli angakupha lokho okucele kuye.”

18 UHana wathi, “Sengathi incekukazi yakho ingathola umusa emehlweni akho.” Lapho-ke wasuka wahamba, wadla, njalo ubuso bakhe babungasadananga.

19 Kusesele ekuseni okwalandelayo bavuka bayakhonza phambi kukaJehova basebebuyela emzini wabo eRama. U-Elikhana walala loHana umkakhe, njalo uJehova wamkhumbula. 20 Ngakho ngokuhamba kwesikhathi uHana wathatha isisu wazala indodana. Wayetha ibizo wathi nguSamuyeli, esithi, “Ngoba ngamcela kuJehova.”

UHana unikela uSamuyeli

21 Kwathi lapho u-Elikhana ehamba labendlu yakhe bonke ukuyanikela umhlatshelo weminyaka yonke kuJehova lokugcwalisa isifungo sakhe, 22 uHana kahambanga. Wathi kumkakhe, “Emva kokuba umfana esekhutshiwe ebeleni, ngizamthatha ngiyemethula phambi kukaJehova, njalo uzahlala khona kokuphela.”

23 U-Elikhana umkakhe wathi kuye, “Yenza lokho okukhanya kukuhle kuwe. Hlala khonapho uze umkhuphe ebeleni; kuphela nje sengathi uJehova angagcwalisa ilizwi lakhe.” Ngakho owesifazana wahlala ekhaya wondla indodana yakhe waze wayikhupha ebeleni.

24 Emva kokuba esekhutshiwe ebeleni, wahamba lomfana, emncane enjalo kanye lenkunzi eyayileminyaka emithathu ubudala, lehefa lefulawa kanye lembodlela yewani, wamusa endlini kaJehova eShilo. 25 Kwathi inkunzi sebeyihlabile, besa umfana ku-Eli,

26 uHana wasesithi kuye, “Ngeqiniso elinjengoba ukhona, nkosi yami, mina ngingulowana umfazi owema phansi kwakho ekhuleka kuJehova.

27 Ngakhulekela umntwana lo, njalo uJehova usengiphile engakucelayo. 28 Ngakho khathesi sengimnika uJehova. Uzanikwa uJehova impilo yakhe yonke.” Wakhonza uJehova khonapho.